Sovü Leit mochn si Sorgn um die Bienen. Die Bienen steabm aus, sogn olle. I moch ma kane Sorgn um de Bienen, i moch ma Sorgn uman Hausvastaund.
Bienen siech i jedn Tog a poa, außa im Winta natiarlich. Ned grod vü, owa doch.
Hausvastaund hob i scho laung koan gsegn. Ehrlich!
Frira is da da Hausvastaund üwaroi begegnt. Und jeda hotn a benutzt. Heite? Wos soll i sogn? Nirgendwo finst an. I glaub, es gibt eam nimma.
Dabei warads so wichtig, dass da Hausvastaund üwalebt.
Es tätn vü mea Leit wissn, dass ma bei an sechzg Quadratmeter Goatn ned mit Round up des Unkraut vanichtn muaß, weil ma des bissl eh mit da Haund a ausreißn kaun. Und daun schreins, die Bienen steabm aus.
Es tätn vü mea Leit wissn, dass ma den Müll richtig trennen soit, weil sunst de Müllgebühren in de Höh schnoizn. Recyclboares Material wiad zoiht, Restmüll muaßt zoihn. Und daun schrein, de haun eh ois zsaum. Jo sicha! Weils nämlich koan Sinn mocht, des Papier und des Plastik zu recyclen, wenn üwaroi de Eierschoin, Aludosn, Glosfloschn, Müchpackln und Bananenschoin drin san. Oda im Biomüll de Blumentäpf und de Plastiksackln. Mei Gott, wos soi scho sei, daun liengan hoit a poa Plastikteilchen mea in da Erdn. Des bissl mochts Kraut a nimma fett. Is eh scho üwaroi!
Und d'Leit tätn vielleicht wissn, dass ma sein Müll ned bei Autofensta aussehaut. Mei Gott, es vateut si eh nua üwa Wiesn, oda an Ocka, wei in da Ortschaft sans eh z'feig. Kenntat jo wea segn.
Mocht jo nix, waun de zwatausend Euro teire Müchkuah aun de Plastikfetzn eingeht. Wos is'n a so deppat und frisst des Zeig? Is a wuascht, waun si de Kaibaln aun de Glosscheabm de Haxn z'schneidn. Oda waun de Glosscheabm de Speiserährn von de Viecha z'schneidt. Koa Problem!
De Müch und des Fleisch kumman eh aussn Supamoakt.
Jo so is des mitn Hausvastaund.
Es hoaßt, waun unsere Bienen tot san, steabm de Menschen a, in vier Joahr.
I sog, waun da Hausvastaund ausstirbt, steabm mia olle ned in a poa Joahr. So laung wiads ned dauern, weil a de gaunzn Politiker auf da Wöt völlig ohne Hausvastaund wuaschtn.
Do wirds wuascht sei, ob de Bienen steabm, oda ned, weil wenns poscht, poschts. Do brauch ma sowieso koane mea.
©by Christiana Zöchling